الثلاثاء، 22 فبراير، 2011

خواطر

فيه ناس تضحي و تتألم بدون سبب
لكن حنانها ملوش حدود
برغم جرح عمره بيكبر كل يوم
لكن طيبتها تملي الوجود
لما تبقي فرحتها الكبيره
سببها ظلم
و لسه ماشيه طريق طويل
كأنه حلم
بس حلم ملوش ملامح
غامق و كالح
و آخره مش باين
و علي جنباته شوك
لو شفت حالهم من بعيد
يصعب عليك
و لو تقرب
تلاقي نفسك من جديد
بجد تلاقي نفسك
تلاقي قلمك تلاقي رسمك
تلاقي صوتك اللي غاب
و يصحي حلمك اللي داب
بعد اما شاب
يرجع عفي
تلقي الأمل ادام عنيك
ملموس و واضح
و تلقي احاسيس تايهة منك
تتخلق تملك ملامح
تبقي جاهزة تنطلق
معقول أمل بيتولد من وسط جرح
معقوله لمسه طير حزين
تولد في قلبي الف فرح
طب ليك عليا يا طير
و القول امانه
لافضل معاك لو حتى موج السيل طوانا
و لو بيني و بينك ألف باب
بين كل باب و باب الفين حجاب
لاوصل و اجيلك
و اضوي ليلك
و امسح دموعك
اللي داوولي الجراح
او ع الاقل اعوضك عن بس جزء من اللي راح
ياللي صوتك رن في وداني غنا
معذور أنا
لو افدي دمعة من عنيك
بكل عمري و الحياه
متقولش اه لا ابتسم
يا ابو بسمه سكه بتترسم
اولها فرحه و ارضها لولي و دهب
ياللي انت ضحيت من زمان
و كانت آلامك بدون سبب

الثلاثاء، 18 نوفمبر، 2008

أبويا مات و عايزين يعرفوا ليه؟؟؟


توفي إلي رحمة الله أبي المهندس/ ابو بكر قنديل يوم 26/9/2008 الموافق 26 رمضان يوم الجمعة بعد أن صلي مباشرة
طبعا الموت حق و الحمد لله من قبل و من بعد
المشكلة في اللي حصل بعد كده...
طلبت الشركة المحترمة التي كان يعمل بها أبي شهادة تفيد عن سبب الوفاة .. و طبعا الست الدكتورة اللي جت كشفت علي والدى رحمه الله و شافت التاريخ الطبي بتاعه و عرفت إن عنده سكر مزمن قالت إنها غيبوبة سكر و بالتالي مكتوب في شهادة الوفاة سبب الوفاة غيبوبة سكر.
لكن هما عايزين ورقة مكتوب فيها أنه بناء علي طلب (فلانة) زوجة المرحوم أصدرنا هذه الورقة إن سبب الوفاة هو كذا.
رحنا مكتب الصحة اللي طلعت منه شهادة الوفاة و هو قريب من بيتنا و قلنا للست الموظفة عايزين ورقة فيها سبب الوفاة فكرتها هتطلع من عندها ورقة و تملاها و تديهالي لكن اللي حصل غير كده
قالت لي لازم تروح مديرية الصحة الرئيسية و تجيب لي أمر من الشئون القانونية و تدفع الرسوم و بعدين تيجي لي تاخد الورقة من عندي
قلت لها حاضر فين مديرية الصحة
و وصفت لي المكان ..
مشوار بتاع 20 دقيقة بالعربية
صحيح مش كتيرأوي بس مشوار
رحت هناك و دخلت علي أول مكتب بتاع الوفيات و المواليد "من فضلك يا استاذة عايز أعمل ورقة بسبب الوفاة"
خدت مني الورق و بصت فيه كويس و قرته كله من الأول للآخر و شهادة الوفاة و قالت لي "ده والدك" قلت لها "أيوة" قالت لي دي مش عندي دي في الدور الثالث الشئون القانونية بعد ربع ساعة من وقوفي أدامها
طلعت الدور الثالث للشئون القانونية و قلت نفس الكلام خدت الورق كله و قرته كله و سألتني ده والدك قلت أيوة و الله والدي قالت لي انزل الدور اللي تحت اسأل علي الدكتور عادل و كان فات كمان ربع ساعة
نزلت أسأل علي الدكتور عادل اللي من الواضح إنه لسه جديد لأن محدش عارفه كل اللي أسأله يقول لي دكتورعادل مين و الله مش عارف
و في النهاية لقيت عاملة خدمات قالت لي الدكترو عادل مش موجود و قال لي لو حد سأل عليا أبعته للأستاذ طه تحت و كان فات كمان ربع ساعة
نزلت تحت أسأل علي الأستاذ طه قالوا لي أهه قلت له الموضوع قال لي دي عايزة إمضاء المدير العام و هو في اجتماع ساعتها احتديت عليه و قلت له دي مكانتش ورقة قال لي أنا أعمل لك إيه أنا الحق عليا إني عايز أمشي لك مصلحتك خليك قاعد بقي اضطريت أسحب معاه ناعم و بعد شوية اقتنع و أخد الورقة دخلها للمدير غابت كمان ربع ساعة و طلعت عليها الإمضاء التاريخي و قال لي ترجع بيها علي الشئون القانونية رجعت علي الشئون القانونية و كانت الساعة لسة مجتش 12 الضهر لقيت المكتب مقفول ياناس يا هو انا عايز ختم الشئون القانونية 3 موظفين كل واحد ياخد الورق و يقراه و يشوف شهادة الوفاة و يقول لي ده والدك لدرجة إني حسين إنهم شاكين فيا و فكرت أعمل تحليل DNA عشان يصدقوا و بعدين آخر واحد وصف لي مكتب رحته فيه واحدة ست بعد ما قرت الورق و شافت شهادة الوفاة و سألتني ده والدك مضت عليها و ختمت و قالت لي روح ادفع الرسوم فين دفع الرسوم قالت لي تطلع برا المبني خالص و تخش تالت مدخل جنبنا تلاقي الخزنة .
المهم نزلت و رحت هناك خدت مني الموظفة الورقة و قرتها و سألتني السؤال التاريخي "ده والدك؟" و قلت لها الإجابة النموذجية "أيوة والدي.." قالت لي ده وارد عند الأستاذ سيد رحت للأستاذ سيد و الراجل بصراحة كان متعاون خد مني الورق و قراه كله و سألني "ده والدك؟" فجاوبته "ايوة والدي.." قال استني هنا شوية فضلت قاعد نص ساعة علي ما قبض زمايله و بعدين قال لي تعالي انت عشان تمشي و عمل لي وصل و طلعت الفلوس و قلت له الرسوم كام قال لي جنيه واحد.
القارئ العزيز
آسف للإطالة و لكن هذا ما حدث كل ده عشان جنيه و طبعا بعدها كانت الساعة عدت معاد الموظفين و الست اللي في الوحدة الصحية روحت و بالتالي مطلعتش الورقة غير تاني يوم .
و من ساعتها بسأل نفسي ليه ميكونش فيه موظف خزينة و شئون قانونية في كل وحدة و بدل الجنيه ياخد خمسة جنيه بس يخلصني بدل كل ده.
يبقي أن أذكر إن ده مكتب صحة عثمان بن عفان ببورسعيد و دي الإدارة الصحية ببورسعيد مش عارف ده مهم و لا لأ بس يعني عشان أبقي اديت كل واحد حقه.
و تبقي في النهاية كلمة واحدة
اشوفكوا في البلالاز

الاثنين، 10 نوفمبر، 2008

مبتدا الكلام


نبدي الكلام بالصلاة علي الحبيب و السلام علي كل من يقرأ هذا الكلام

أعرفكم بنفسي أنا أخوكم محمود شاب مصري أبيض متوسط

متوسط الطول متوسط السمنة متوسط اجتماعيا متوسط سنا

و بما إني أبيض البشرة و جنسيتي مصري و عندي 24 سنة أبقي شاب مصري أبيض متوسط

أحب أعرفكم إن مكانش عندي نية التدوين بصراحة

كان نفسي أبقي مهندس و الثانوية مساعدتنيش

كان نفسي أبقي كاتب و ملحن و الوسط الفني مكانش مناسب

كان نفسي و كان نفسي زي ما شباب كتير نفسه و منفعش

بس واحد قعد معايا بتاع ربع ساعة من نفسه قال لي لازم تعمل مدونة انت موهوب

موهوب إزاي مش عارف و حتى لحظة كتابة هذه السطور أنا معرفش الراجل ده شخصيا مجرد واحد عملت له شغلانة

أصلي باشتغل في مكتب كومبيوتر

بس قلت أجرب يمكن

مدونتي اسمها بلالاز

هقولك و الله

بلالاز يعني كل حاجة في البلالاز

كنت بحب بنت جدا جدا و أنا في الجامعة و ظروف تعارفنا و تعاملنا مع بعض مش هتصدقوها لو حكيتها

طب اتجوزنا ؟؟؟ لأ

ليييييييييييييييه؟؟؟

بلالاز

مديري في الشغل راجل محترم جدا بس مغرقنا في البلالاز و للأمانة دي كلمته يعني مش أنا اللي مخترعها كل طلب نطلبه منه و برغم منطقيته و حاجتنا ليه يقولك بلالاز يعني بلغة الحكومة البند لا يسمح و أغلب الأحيان بيبقي المزاج لا يسمح

فهمتوا يعني إيه بلالاز بفتح الباء و اللام الأولي و تشديد اللام الثانية و التأكيد علي سكون حرف الزين يعني بلالاّززززززززززز

هكتب ليه ؟؟ مش عارف

هكتب ايه؟؟ مش عارف

هكتب تاني أصلا؟؟ مش عارف

بس أوعدكوا لو ربنا قدرني هكتب

و أقولكم سلام و أشوفكم في البلالاز